Rosa canina, trëndafili i egër - Vetitë dhe mënyrat e përdorimit

Arbëria 

Ky material është shkëputur nga Libri ''Bimët Mjekësore dhe Shëndeti''.

Nuk mund të kopjohet pa Autorizimin e stafit tonë!

Të gjitha të drejtat i takojnë firmës Arbëria ®

Rosa canina: Trëndafili i egër (trëndafil qeni).

Familja: Rosaceae.

Trëndafili i egër është një shkurre me degë gjëmbore 2-4 metra e lartë. Rrënjën e ka të gjatë e fibroze dhe prodhon shumë degë me gjatësi deri 3.5 metra. Nga maji deri në gusht degët mbushen me lule të bardha pesëpetalëshe, të vetmuara ose nga dy e nga tre, me aromë shumë të këndshme. Ky trëndafil gjethet i ka me dhëmbë të thjeshtë dhe pjesërisht me dhëmbë të dyfishtë. Frytet piqen në gusht-shtator.

Besohet se shëron njerëzit e kafshuar nga qeni i tërbuar, prandaj, që në kohë të vjetra është quajtur edhe “trëndafil qeni”.

Trëndafili i qenit e ka origjinën në Evropë dhe në Lindjen e Mesme.

Në Shqipëri rritet pothuajse i zakonshëm nëpër toka gurishtore, nëpër pyje shkurresh, nëpër argjinatura e gardhe të pakujdesura, në gjithë zonën e ulët deri në zonën subalpine.

Pjesë të përdorshme: Frytet. Në disa mënyra mjekimi përdoren edhe petalet e luleve të freskëta, madje edhe gjethet.

Frytet mblidhen në ditë me diell, në fazën e parë të pjekjes, dhe thahen menjëherë në hije, në vende me qarkullim të bollshëm ajri.

Përmban: Vitaminë C, (30-80 herë më shumë se portokallet e limonat dhe është  mrekullisht e qëndrueshme edhe ndaj zierjes së gjatë në temperaturë të lartë), provitaminë A (antioksidante), vit. P, E, B e K, karotinë, acide organike, tanin, sheqerna, vaj esencial, flavonoide, pektina, proteina, pigmente, etj.

                                                           

     Cilësitë kryesore vepruese: Vitaminike, antiinfiamatore, stomakike, antioksidante, tonike, adstringjente, diuretike.

          Qëllimi i përdorimit:

- Qëllimi kryesor dhe më i rëndësishmi është ai i përfitimit të vitaminës C

- Përdoret si tonik.

- Përdoret për të rritur rezistencën e organizmit ndaj të ftohtit, ndaj gripit, ndaj fytit të irrituar, ndaj infeksioneve të gjoksit, etj.

- Përdoret pas ndonjë kure me antibiotikë për të riekuilibruar gjendjen e baktereve të dobishëm në stomak e në zorrë, të cilët përdorimi i antibiotikëve i shkatërron.  
- Përdoret kundër infiamacioneve në veshka dhe në fshikëzën e urinës.
- Përdoret kundër ezaurimentit nervor.
- Përdoret kundër rrudhave dhe kundër plakjes së lëkurës në përgjithësi, etj.
- Vaji esencial i trëndafilit të egër përdoret për të mjekuar ekzemën, psoriazën, përdoret në aromaterapi, etj.

Mënyra e përdorimit:

- Në formë dekokti: Marrim tre lugë kafeje me kokrra të freskëta (ose një lugë kafeje me kokrra të thara), në të dy rastet pjesërisht të thërmuara, dhe i përziejmë me 200 ml. ujë të ftohtë pa klor. I hedhim në një enë balte ose porcelani me kapak dhe i vëmë në zjarr, deri sa të fillojë të valojë. Kur fillon të valojë e ulim forcën e zjarrit dhe e lëmë ashtu edhe 10 minuta të tjera, pastaj e heqim, e kullojmë, e lëmë të ftohet, e ëmbëlsojmë me mjalt ose me sheqer dhe këtë sasi e pimë të ftohtë gjatë gjithë ditës, disa herë nga pak.

- Shurup: Përgatisim si më lart, por me dyfishin e kokrrave në të njëjtën sasi uji, një dekokt të fortë. Pasi e kullojmë, ende të vakët e përziejmë mirë me një lugë gjelle mjalt për çdo 100 ml. lëng. E hedhim të tërë në një shishe të errët dhe e përdorim gjatë ditës, duke pirë nga pak herë pas here. Konsumohen 100 ml. në ditë.

         

 - Në formë infuzi: Dy lugë kafeje me kokrra të thara të thërmuara i hedhim në 500 ml. ujë dhe i valojmë dhjetë minuta, pastaj i heqim nga zjarri dhe i lëmë në qetësi 15-20 orë. Kullojmë lëngun dhe e pimë të ngrohtë e të ëmbëlsuar sipas dëshirës. Kjo sasi mjafton për dy ditë. 

- Në formë maske bukurie: merren fryte të freskëta të trëndafilit të qenit dhe grihen në grirës kuzhine, kullohen me kujdes në një napë të palosur dysh, pastaj lëngu vendoset me delikatesë në gjithë lëkurën e fytyrës, duke ndejtur shtrirë mbrapsht. Mbahet 15-20 min., pastaj shplahet me ujë të vakët.

Ka efekt të mrekullueshëm pastrues, lëmues rrudhash dhe gjallërues të lëkurës.

(Për qëllime vitaminike, trupi i njeriut i plotëson kërkesat ditore me 8-10 kokrra të trëndafilit të qenit).

- Nëse përdoret e kombinuar me bimë të tjera mjekësore forcon efektin e tyre kurativ.

Kujdes!

- Gratë shtatzëna nuk duhet të përdorin vajin esencial të trëndafilit të qenit, sidomos në muajt e parë të barrës.

- Njerëz të veçantë mund të jenë alergjikë ndaj kokrrave të trëndafilit të qenit. Nëse shfaqet diaré, shqetësime në fyt, etj., të ndërpritet menjëherë përdorimi i mëtejshëm.

- Mos merrni doza të mëdha. Mjaftojnë pak kokrra në ditë për të gjitha nevojat tuaja.

- Nuk ka asnjë ndërveprim të dëmshëm me çfarëdo produkti farmaceutik të përdorur njëkohësisht me kokrrat e trëndafilit të qenit.E gjeni në dyqanin Bimë Mjekësore.

Hani çdo ditë një ylber

Hani çdo ditë një ''ylber''.

Frutat dhe perimet ndahen në 5 kategori ngjyrash; e kuqja, e purport /blu, portokalli, jeshile dhe bojëkafe/e bardhë. Çdo ngjyrë përmban në vetvete një tërësi lëndësh kimike sëmundje luftuese, të cilat quhen fitokimikate. Janë pikërisht këto fitokimikate që u japin frutave dhe perimeve ngjyrat rrëzëllitëse dhe sigurisht disa nga vlerat e tyre ushqyese.

Çfarë përmban secila ngjyrë? 

E kuqja
 
Frutat dhe perimet e kuqe janë të ngjyrosura nga një pigment natyral bimor i cili quhet likopen. Likopeni është një antioksidant i fuqishëm i cili ndihmon në uljen e rrezikut të kancerit dhe e mban zemrën të shëndetshme. Frutat dhe perimet e kuqe përmbajnë edhe fenole, kuercetin  dhe hesperidin, të cilat ulin rrezikun e kancerit të prostatës, ulin tensionin e lartë të gjakut dhe kolesterolin e keq. Ato gjithashtu luftojnë radikalet e lira dhe mbrojnë gjymtyrët nga rastet e artritit.

E purpurt /Blu
 
Pigmenti i bimës i quajtur antocianin është ai që u jep këtyre frutave dhe perimeve ngjyrën dalluese të purport ose blu. Antocianina ka gjithashtu cilësi antioksidative të cilat mbrojnë qelizat nga dëmtimi dhe ulin rrezikun për zhvillimin e kancerit dhe tumoreve, trombozës dhe sëmundjet e zemrës. Frutat dhe perimet e këtij grupi gjithashtu përmirësojnë përthithjen e kalciumit dhe mineraleve të tjera, luftojnë infiamacionet, dhe shërbejnë si antikarcinogjene në traktin tretës. Në përgjithësi shërbejnë për të kufizuar aktivitetin e qelizave kancerogjene.

Portokalli/E verdhë
 
Karotenoidet i japin këtij grupi ngjyrën e tyre dalluese. Nië karotenoid i njohur si betakaroten gjendet tek patatet e ëmbla, kungulli dhe karrotat. Ai konvertohet në Vitaminë A i cili ndihmon në mirëmbajtjen e membranave qelizore dhe syve. Një tjetër karotenoid i quajtur lutein akumulohet tek sytë duke i mbrojtur ato nga katarakti dhe sëmundje të tjera që çojnë në verbim. frutat dhe perimet e këtij grupi përmbajnë edhe flavonoide, likopene, potas, dhe Vitaminë C. Këto janë vlera ushqimore të cilat ulin nivelin e kolesterolit të keq, ndihmojnë prodhimin e kolagjenit (e rëndësishme për lëkurën dhe gjymtyrët), inkurajojnë balancën alkaline (shumë e rëndësishme për t'u mbrojtur nga kanceri), dhe bashkëpunojnë me kalciumin dhe magnezin për të formuar dhe ruajtur kocka të forta. 
 

Të gjelbrat
 
Perimet e gjelbra përmbajnë një sërë fitokimikatesh përfshirë këtu edhe karotenoidet, saponinën dhe kristalinë alkaloide, të cilat kanë cilësi anti-kancerogjene. Gjethet e gjelbra si spinaqi, brokoli dhe kale, janë gjithashtu një burim shumë i mirë folati.
Të gjelbrat gjithashtu përmbajnë nga Klorofil, fibra, lutein, kalcium, Vitaminë C dhe Beta-karoten. Këto largojnë rrezikun e kancerit, ulin presionin e lartë të gjakut dhe kolesterolin e keq, normalizojnë tretjen, mbështesin shëndetin e syve dhe shikimit, gjithashtu mbështesin dhe forcojnë aktivitetin imunitar. 


Bojëkafe/të bardha
 
Frutat e bardha përmbajnë një mori fitokimikatesh të shëndetshme si alicin (e cila gjendet tek hurdhrat), e cila njihet si antiviral dhe antibacterial i fuqishëm. Disa pjesëtarë të grupit të bardhë si bananet dhe patatet janë edhe një burim i mirë potasi. Këto përmbajnë gjithashtu Beta-glukan dhe linjane të cilat sigurojnë fuqinë e sistemit imunitar, ulin rrezikun e kancerit të zorrës së trashë dhe kancerit të gjirit dhe balancojnë hormonet.

 
Krijoni ylber në pjatat tuaja.

Duke ofruar një varjetet ngjyrash për fëmijët jo vetëm e bën ushqimin më interesant por edhe sigurohesh që fëmijët po marrin vlera të panumërta ushqyese. Krijoni sallatëra me ngjyrat e ylberit duke i vendosur frutat dhe perimet të gjitha pa harruar asnjë prej tyre: portokalle, luleshtrydhe, mango, kivi, banane, boronica, fruta pylli të egra etj. Zieni në avull brokoli, qepë të kuqe, karrota, kërpudha, dhe misra të vegjël. Jo vetëm fëmijët por edhe të rriturit tërhiqen nga ngjyrat, prandaj asnjë prej tyre nuk duhet të mungojë në tavolinë.

Lista e ngjyrave.

Të kuqe: Domate, Speca të kuq (djegës dhe jo djegës), Rrepat, Panxhari, Luleshtrydhet, Qershitë, Rrushi i kuq, Manaferrat dhe maretë, Shalqini, Mollët e kuqe, Portokallet e kuqe, Qitro, Guava, Papaya, Shegët, Qepët e kuqe, Patatja e kuqe. 

Të purpurta/blu: Panxhari, Lakrat e purpurta, Patëllxhanët, Shpargujt, Kumbullat.

Portokalli/të verdha: Karrotat, Pjepri, Limonat, Specat e verdhë, Patatja e ëmbël, Kungujt, Ananasi, Mangot, Misri, Portokallet, Kungulli i vjeshtës, Pjeshkat, Nektarinat, Kajsitë, Rrushi.

Të gjelbrat: Spinaqi, Specat e gjelbra, Brokoli, Kale, Radhiqe, Hithra, Shpargujt, Avokadot, Bizelet, Mollët jeshile, Rrushi jeshil, Kivi, Fasulet jeshile, Lakrat jeshile të mëdha, Lakrat e brukselit, Selinoja, Kastraveci.

Bojëkafe/të bardha: Lakra e bardhë dhe lulelakra, Preshët, Dardhat, Kërpudhat, Hurdhrat, Bananet, Patatet, Gingeri (xhenxhefili), Qepët e bardha.

Material nga:  Bimë Mjekësore

Kamomili. Vetitë dhe mënyrat e përdorimit.

Ky material është shkëputur nga Libri ''Bimët Mjekësore dhe Shëndeti''.

Nuk mund të kopjohet pa Autorizimin e stafit tonë!

Të gjitha të drejtat i takojnë firmës ''ARBËRIA''.

Kamomili. 
Bot: Matricaria chamomilla.  

 

Pjesë të përdorshme: Pjesa e lules, pa bisht e të pa hapura plotësisht, të mbledhura me kujdes e të thara në hije.

Përmban: Vaj esencial, esencë me azulen, apigeninë, acid salicilik, heterozide diaforetike, fitosterinë, acid yndyror, vitaminë B/1, vitaminë C, etj.

Cilësitë kryesore vepruese: Adstringjente, emenagoge, karminative, tonike, sedative, aperitive, refrigjeruese, cikatrizuese, antinevralgjike, antispazmodike, antiinfiamatore,  antibakteriale, antialergjike, etj. 

            Qëllimi i përdorimit:

             - Një çaj kamomili, i përdorur për të pirë, për lavazh ose kompresë, mund të zgjidhë disa probleme të organeve femërore, që nga infeksionet deri në përmirësimin e menstruacioneve që mund të vonohen.

            - Çaji i kamomilit qetëson fëmijët e nervozuar, sidomos në kohën e daljes së dhëmbëve.

- Cilësitë karminative të kamomilit ndihmojnë për të çliruar zorrët nga gazrat, ndihmojnë edhe në rastet me diaré, konstipacion dhe ulçera peptike.

- Është i dobishëm në mostretje. (Ndihmon për tretjen e mirë të ushqimit).

- Përdoret kundër aciditetit në stomak.

- Kundër dhëmbjeve (ngërçeve) të barkut.

- Çaji i kamomilit lehtëson gjendjet gripale, duke pakësuar dhimbjen e kokës dhe temperaturën e lartë.

- Nëse pihet gjysmë ore para fjetjes, ndihmon për një gjumë të mirë.

- Ky çaj qetëson dhimbjet e dhëmbëve, të artritit dhe tensionin para menstrual.

- Në forma nga më të ndryshmet përdoret për të qetësuar lëkurën e irrituar, sidomos atë të fytyrës.

- Shplarja e flokëve me infuz kamomili iu jep atyre shkëlqim.

- Lulet e kamomilit mund të përdoren për banjo aromatike me efekt tonik e qetësues.

- Për kurimin e plagëve këshillohet në stadin fillestar, ose në stadin kronik, ndërsa kur plaga hyn në fazën e shërimit nuk këshillohet.

- Kompresat me çaj kamomili lehtësisht të vakët, i japin elasticitet lëkurës së fytyrës.

- Në kozmetikë, prej mijëra vjetësh, kamomili ka një vend shumë të preferuar.  

 Mënyra e përdorimit:

Kamomili më i mirë është ai që mblidhet në ditë me diell dhe thahet menjëherë në hije, në ambiente të ajrosura mirë.

- Forma më e përdorur e kamomilit është infuzi. Një lugë kafeje me lule të thata, i hedhim në një gotë ujë të nxehtë, i mbulojmë dhe i lëmë në qetësi 7-10 min. Kullojmë lëngun, e ëmbëlsojmë sipas dëshirës me sheqer ose me mjalt dhe e pimë. Merren tre-katër filxhanë çaji në ditë.

  

Kujdes!

          Shumë rrallë mund të ketë persona alergjikë ndaj kamomilit, por nëse jep shqetësim të çfarëdoshëm, përdorimi ndërpritet. E njëjta gjë mund të thuhet edhe për personat me lëkurë shumë të ndjeshme, kur vihet re irritim.

 Lule kamomili gjeni në dyqanin Bimë Mjekësore.
  40 gramë - 100 lekë

                                             

Adresa:


Tiranë - Dyqani Bimë Mjekësore - Rruga "Hoxha Tahsin", 30 metra lag Qendrës Stefan

Hapur nga e HËNA - SHTUNËN. Orari: 12:00 -19:00.

Hithra. Vetitë dhe mënyrat e përdorimit.

Ky material është shkëputur nga Libri ''Bimët Mjekësore dhe Shëndeti''.

Nuk mund të kopjohet pa Autorizimin e stafit tonë!

Të gjitha të drejtat i takojnë firmës ''ARBËRIA''.

Bot: Urtica dioeca: Hithra.

Familja: Urticaceae.

Kjo është një bimë barishtore shumëvjeçare, e cila në gjithë botën përfshin rreth 500 lloje. Në Shqipëri rritet pothuajse e zakonshme kudo, që nga jugu deri në veri, afër banesave, nëpër gardhe, në gërmalla, në gurishte, në djerrishte, etj.

Pjesë të përdorshme: Gjethet dhe lulet.

Cilësitë kryesore vepruese: Dermike, diuretike, antidiabetike, hemopojetike, telehemostatike, uragoge, hemostatike, antialergjike, ekspektorante, galaktagoge, antidiarroike, adstringjente, etj.

Qëllimi i përdorimit:

- kundër infiamacionit të rrugëve urinare;

- kundër hemoragjive të brendshme;

- kundër zmadhimit jo malinj të gjendrës së prostatës (sidomos rrënjët);

- kundër rrufës alergjike shkaktuar nga bari, kundër alergjisë së syve, kundër teshtitjes;

- kundër kollës, gëlbazës dhe flegmës (së mushkërive);

- kundër rrjedhjes së gjakut nga hundët;

- për pastrimin e flegmës nga mushkëritë dhe nga stomaku;

- kundër zbokthit, por dhe ndihmuese për forcimin e flokëve të holluar (sidomos rrënjët);

- për të përfituar minerale në organizëm.

Mënyra e përdorimit:

- Në formë infuzi: marrim 25 gr. gjethe të freskëta hithre (ose 5 gr. bimë të tharë), i bashkojmë me një filxhan çaji ujë pa klor, të ftohtë. E vendosim enën në zjarr, e lëmë sa të valojë, pastaj e heqim nga zjarri dhe e lëmë të qetë 10-12 min., të mbuluar me kapak. Pasi e kullojmë është gati për përdorim, ëmbëlsuar me mjalt ose me sheqer, sipas dëshirës. Ky çaj pihet i ngrohtë, ose i ftohtë. Përdoret si tonik i përgjithshëm, diuretik, përfitues mineralesh, vitaminash, etj., duke marrë tre-katër filxhanë çaji në ditë. (Në të njëjtën mënyrë mund të përdoren edhe rrënjët).

- Dekokt kundër zbokthit: marrim 130 ml. ujë të ftohtë pa klor, e bashkojmë me 130 ml. uthull rrushi, shtojmë 10 gr. rrënjë të thara (ose 50 gr. rrënjë të freskëta), e vendosim në zjarr të lehtë dhe, pasi valon 2-3 min. e heqim. Enën e lëmë në qetësi 20-30 min., mbuluar me kapak, pastaj e kullojmë dhe e përdorim për të lyer kokën, duke e fërkuar lehtë disa minuta, kudo që kemi flokë. Heq zbokthin e njëkohësisht forcon flokët e dobësuar e të holluar.

- Për të pastruar gjakun, përdoret në formë infuzi, e vetme ose e bashkuar me bimë të tjera, si p.sh.: me rrënjë radhiqje, me rrënjë rrodhe, etj.

- Hithra përdoret edhe e përgatitur në formë tinkture, ekstrakti të lëngët, shurupi, pomade, etj.

- Përdoret gjithashtu e gatuar në mënyra të ndryshme, por asnjëherë nuk duhet përdorur e gjallë, sepse shkakton probleme (djegie, skuqje, kruarje) kudo që na prek.

Kujdes!

- Ka njerëz që janë alergjikë ndaj hithrës. Natyrisht, ata nuk duhet  ta përdorin.

          - Kush përdor hithrën për të pastruar rrugët urinare, ndërkohë duhet të pijë shumë ujë.

- Përgatesat e hithrës nuk duhen përdorur nga ata që  vuajnë nga mbajtja e lëngjeve, si rezultat i problemeve në zemër ose në veshka.

- Kush mjekohet me preparate farmaceutike kundër artritit duhet të këshillohet me mjekun para përdorimit të hithrës. 

Më shumë informacione gjeni në Librin ''Bimët Mjekësore dhe Shëndeti''.

E gjeni në dyqanin Bimë Mjekësore

Ju mirëpresim të gjithëve!